नवी दिल्ली  : इराणमधील आणखी एक किंवा दोन लक्ष्यांचा बंदोबस्त करायचा आहे, असा इशारा अमेरिकेचे राष्ट्राध्यक्ष डोनाल्ड ट्रम्प यांनी दिला आहे. इराणचे सर्वोच्च नेते मोजताबा खामेनी यांनी अमेरिका आणि इस्रायलला कालच युद्धाचं नवं आव्हान दिलं होतं. त्यानंतर, लागलीच डोनाल्ड ट्रम्प यांनीही प्रतिक्रिया दिली आहे.

 

शनिवारी फ्लोरिडा येथील आपल्या निवासस्थानी पत्रकारांशी बोलताना ट्रम्प म्हणाले की, अमेरिकेने इराणची लष्करी क्षमता आणि अणु कार्यक्रम लक्षणीयरीत्या कमकुवत केली आहे, परंतु अद्याप काही लक्ष्यांवर कारवाई करणे बाकी आहे. एएफपी या वृत्तसंस्थेच्या अहवालानुसार ट्रम्प म्हणाले, आम्ही त्यांची अणु यंत्रणा उद्ध्वस्त केली आहे. मला वाटते की आम्हाला अजूनही एक किंवा दोन ठिकाणांचा बंदोबस्त करावा लागेल, परंतु आम्ही ते १० मिनिटांत करू शकतो.फफ त्यांनी इराणच्या नतांझ अणु प्रकल्पाजवळील पिकॅक्स माउंटन या संशयित भूमिगत अणु संकुलाचा विशेष उल्लेख केला आणि अमेरिका त्याचा बंदोबस्त करेल असे सांगितले.

इराणने काय दिला होता इशारा

कालच, खामेनी यांनी एका लेखी संदेशात म्हटले होते की, जर त्यांच्या विरोधकांनी पुन्हा लष्करी किंवा दहशतवादी हल्ले सुरू केले, तर इराण या नव्या संघर्षाचा शेवट करण्याची वेळ आणि अटी निश्चित करेल. त्यांनी शत्रूच्या कोणत्याही धमकीला तात्काळ, प्रभावी आणि भौगोलिकदृष्ट्या अनिर्बंध उत्तर देण्याचे आवाहन केले. त्यांनी सशस्त्र दलांना अमेरिकन आणि इस्रायली मालमत्ता आपल्या हल्ल्याच्या टप्प्यात आणण्यासाठी त्यांची लक्ष्य सूची अद्ययावत करण्याचे निर्देश दिले. खामेनी यांनी सशस्त्र दलांना पाळत ठेवणे, साहाय्य पुरवणे आणि लढाऊ कारवायांसाठी आवश्यक असलेल्या दारूगोळा आणि शस्त्रास्त्रांचे उत्पादन वाढवण्याचे निर्देशही दिले. तसेच लष्करी गुप्तचर क्षमता मजबूत करण्याचे आणि स्वदेशी संरक्षण क्षमता विकसित करण्याचे आवाहन केले.

मध्यवर्ती निवडणुकांनंतर अमेरिका पुन्हा हल्ले करू शकते

एमएस नाऊच्या वृत्तानुसार, ३ नोव्हेंबर रोजी होणार्‍या अमेरिकेच्या मध्यवर्ती निवडणुकांनंतर ट्रम्प प्रशासन इराणवर पुन्हा हल्ले करण्याची योजना आखत आहे, ज्यामुळे दोन्ही देशांमधील लष्करी संघर्षाचा एक नवीन टप्पा सुरू होऊ शकतो. ट्रम्प यांच्या ताज्या वक्तव्यांमुळे लष्करी कारवाई पुन्हा सुरू होण्याच्या शक्यतेबद्दलच्या चर्चा वाढल्या आहेत, जरी त्यांनी वॉशिंग्टन संघर्ष संपवण्यासाठी राजनैतिक प्रयत्न करत असल्याचे म्हटले आहे.

त्यापूर्वी शनिवारी अमेरिकेचे परराष्ट्र मंत्री मार्को रुबिओ म्हणाले होते की, ट्रम्प यांनी इराणवर नवे हल्ले करण्याचा कोणताही निर्णय घेतलेला नाही आणि वॉशिंग्टन अजूनही राजनैतिक तोडग्यासाठी तयार आहे. ट्रम्प यांनी असेही सांगितले की इराणसोबतची चर्चा पुढे सरकत आहे, परंतु त्यांनी इराणच्या विश्वासार्हतेवर प्रश्नचिन्ह उपस्थित केले. वॉशिंग्टनला नवीन हल्ला करण्याची कोणतीही घाई नाही कारण त्यांनी इराणच्या लष्करी आणि अणु कार्यक्रमाचे आधीच मोठे नुकसान केले आहे, असे सांगत ट्रम्प म्हणाले, ङ्गङ्घआमची चर्चा चांगली सुरू आहे, पण तुम्हाला माहीत आहे की ते फारसे विश्वासार्ह नाहीत.फफ